Aatankwadiyon ke liye ek sandesh

Chalo chalein nav yug ki oar
Mana tumme rosh bahut hai, nai khoon ka josh bahut hai.
Gusse ko ab chchodo bhi tum, lakshyon ko ab modo bhi tum.
Thamo nav jeevan ki dor.
Chalo….
Mana, tumne bahut hai khoya, kshamta se kuch kam hi paaya.
Chchoota jo,wo sab paa loge, sahi raah par agar chaloge.
Dekho aayi nai bhor,
Chalo…
Kitne kashton ko tum sahte? Khud ko hi tum chchalte rahte.
Kyun jillat ka jeevan jeete? Andheron me tum kyun rahte.
Dekho ab sooraj ki oar.
Chalo..
Ham jaise, tum bhi aye ho, tum bhi manu ke hi jaye ho.
Ham jaise adhikar tumhare, tum ho ham sabke hi pyare.
Bandh karo yuddhon ka shor,
Chalo..
Manavta ki sakh ko dekho, khud ke andar zhank ke dekho.
Dushta vicharon ko tum tyaago, galti ki to maafi maango.
Kyun darte? Jaise ho chor,
Chalo…
Zagdon se kya haasil hoga? Manav ka hi khoon bahega.
Ma ke sheesh ko aab mat zhukao, shakti ko mat vyarth gavao.
Sahi disha me lagao jor,
Chalo…